Flatar ut mest der kurva har vore skeivast

I nærområdet til Tine Byrkjelo kom berre litt over 15 % av årsvolum mjølk i tredje kvartal i 2019. I i 2024 er delen auka til omlag 19 %. For eit område med om lag 100 millioner liter betyr det nesten 4 millioner liter meir i tredje kvartal og om lag 4 millioner liter mindre i første kvartal. Det er ei betydeleg utflating. Det har vorte noko meir kalving på etterjulsvinteren. Men nesten like viktig, er at dei som framleis har mykje haustkalving også har nokre kyr som kalvar på etterjulsvinteren og difor held produksjonen i gang ut over sommaren. Stopp i mjølkeproduksjonen i 2-3 månader om sommaren er sjeldan hos dei som byggjer ny fjøs. Årsaka er rett og slett at mjølkepris og ikkje minst avdrått blir for låg, og difor for dårleg totaløkonomi.

Jamnare inngang gjennom året i Tine Byrkjelo

Tine Byrkjelo produserer om lag 65 % av brunosten og 40 % av Norvegia som blir produsert i Tine. Meieriet er plassert i eit område med tradisjonelt mykje haustkalving. Vi har tatt ein prat med anleggssjefen ved Tine Byrkjelo, John Krøke.

- Vi merkar ein jamnare inngang av mjølk gjennom året, fortel John. - Dette har stor betydning for effektiviteten på anlegget, i tillegg får vi jamnare kvalitet på råstoffet inn til meieriet. Når det vert mykje mjølk frå seinlaktasjonen kan det gå ut over ostekvaliteten. Vi er veldig godt nøgd med utviklinga dei seinare åra. Kvaliteten på mjølka vi får inn til anlegget er topp heile året. Jamnare inngang av mjølk kombinert med god kvalitet på ystemjølka gjer til at anlegget blir meir effektivt og dermed bidrar endå meir positivt til totalresultatet i Tine, avsluttar John.

Han hyllar både mjølkeprodusentane og Tine rådgiving for den positive utviklinga.